Служба преподобному и богоносному отцу нашему Давиду Гареджийскому (переходящее празднование в четверг по Вознесении)
Аще изволит предстоятель, творим бдение.
На малой вечерни
На Господи, воззвах: стихиры, глас 4
Подобен: Дал еси:
Приидите, вернии, празднолюбцы, на собор сей святый преподобнаго отца нашего Давида, иже пришествием своим просветил, яко солнцем, пустыню сию, жилище зверей, и вместо сих вселил люди равноангельныя, во еже прославляти Иисуса Всемогущего и Спасителя душ наших. (Дважды)
Преподобнаго брата Лукиана, устрашена драконом злым, блаженне, на земли лежаща возставил еси и рекл еси: ”Брате, чесо ради устрашился еси, червя единаго, егоже Господь с небеси огнем пожже, но пойдем во свояси и во еже согласно прославляти нам Бога, Иисуса Всемогущаго и Спасителя душ наших.
Радуются ивиры, принявши тебя, и вящше хвалится пустыня твоя, юже Гареджи нарекл еси, блаженне, положением в ней мощей твоих, возлюбленный отче, в нейже собраннии тобою прославляют Иисуса Всемогущаго и Спасителя душ наших.
Слава, глас 8.
Подобен: Едем:
Монахов множество, Давиде, предстоятеля тя быти исповедует, богоносе, тобою бо познаша истинно путь правый, имже шествуя непревратно, избегают путей лукавых, и ублажают тя, истиннаго раба Божия, иже хитросплетения диавола расточил еси, сликовниче небесных безтелесных и сподвижниче святых отец, с ними же моли Христа Бога, еже помиловати Ему души наша предстательством твоим.
И ныне: праздника.
Стихиры на стиховне, глас 2:
Приидите, пустыннолюбцы и вожделеющии божественнаго жительства, приидите, воспоим преподобнаго отца нашего великаго Давида, яко сей соделася нам виною зде пребывания, всем, яже прежде нас, и нам, и паки всем по нам хотящим внити, и помолимся ему, яко да предстательством его избавит Христос души наша от мучений.
Стих: Честна пред Господем смерть преподобных Его.
Яко богатство духовное и сокровище божественное стяжахом мы гробницу твою, в нейже собрани мощи твои, Давиде славный, сило и похвало монашеская, Христа Бога моли даровати цареви нашему мир, и души наша от мучений избавити, яко Милостив есть и Человеколюбец.
Стих: Что воздам Господеви о всех, яже воздаде ми.
Божественную мудрость возлюбил еси и сего ради вся яже в мире, яко сор вменил еси воз благая, яже Бог уготова тебе, Давиде, всеблаженне отче, ихже око человека не виде, и ухо не слыша, в няже вселивыйся, радуешися в них во веки.
Слава: глас 5
Преподобный отче, не дал еси сна очима твоима, ниже дремания веждома твоима, дондеже душу и плоть от страстей свободил еси, и тебе уготовася Духа жилище, прииде Христос со Отцем и обитель в тебе сотвори, и Единосущней Троицы угодник был еси, Давиде, отче наш, молися о душах наших.
И ныне: праздника.
Тропарь: глас 4.
Потом подвижническим растворенные слез потоки предаждь ныне цареви, в молитву еже молити яко дар молитвенный, и проси возродити его, слезы бо сеял и, яко класы, пожал еси плоды пустынныя, о Давиде, светлосте мира и предстателю душ наших.
И ныне: Еже от века.
На великой вечерни.
Поем: Блажен муж. 1 антифон,
На Господи, воззвах: Стихиры праздника 3 и преподобнаго 5, глас 6.
Подобен: Все упование:
Яко облако вар пустынный прохлаждаеши приходящим к тебе, и младенчества их добрый питатель бываеши, отче Давиде возлюбленный, и яко мати, на лоне своем упокояеши, сего ради несовершенныя с совершенными и юноши со отроки вкупе со старцы и престарелыми на праздник твой достойно собрашася, хвалити тя пением богодарованным. (Дважды)
Египет страстей жезлом страстей поражая, не умедлил еси изыти и поработитися Богу твоему, ведал бо еси добре, яко не мощно работати Иже превыше разумов, аще не превыше плоти обрящется и убежит Египта, еже есть горькая работа плоти, от неяже избаву к тебе притекающим людем даруй, и настави Христу Богу работати. (Дважды)
О яко красно видети всем голубя славна, благодатьми украшенна, иже прия, яко криле, дело и видение, и почи в пустыни, идеже чаяше Бога Спаса избавляюща его. Сего ради и свободися от уз и дебельства плотскаго, и исповеда имя Господа Саваофа, и предстательствует пред Ним о воспевающих его.
Слава: глас 6.
Подобен: Река:
Образ и подобие Божие высокое неприкосновенно и свято соблюл еси, и страстей погибельных главою разум поставил еси, и подвигом, безплотным подражающим, елико мощно, подражатель Божества показался еси, сильно бо принудил еси естество, и потщался еси хуждшее превосходнейшему повинути и плоть сию противящуся духу поработити. Сего ради показался еси начальник монахов и градотворец праздных пустынь, и наставник благоуспешных, и добродетели истинное и неблазненное правило, и ныне разрешшеся зерцалам, Давиде, зриши на небесах славу Святыя Троицы и просиши, кроме ходатая, воспевающим тя любовию и верою мира и оставления и велия милости, богоносе.
И ныне: праздника.
По входе, прокимен дне, и чтения г преподобным. На литии, стихиры праздника, или храма, и преподобнаго, глас 5
Величию благодатей Твоих, Христе, удивишася вси, положил бо еси каменная во езеро водное, землю же безводную и непроходную многими исполнил потоки водными, се бо зрим вси пустыню неогражденную яко град празднующих, тии же объяша отвсюду раку святую служителя Твоего Давида словущаго, яко ковчег Завета, и сокровище полноты благодатей, и тако возглашают в веселии: яко красна куща твоя, Иакове, и место пространно (Быт 26,22) жительства твоего, о Израилю избранный, яко стан Божий и покой всех нас Владыки.
Преподобный отче Давиде мудрый, подобно солнцу просветились силы тии чудотворныя, яже тобою содеяшася в пустыни сей, божественною бо благодатию безсловесныя яко словесныя послужиша ти, и звери возбранением вон бежаша, человецы же тобою исцелевшя славляху Бога.
Глас 7. Антониево1: Давида, благоговения непоколебимаго столпа и страхом Божиим сотворенную крепость невоеванную, образа нелестныя правды и постничества неблазненна, лице твердаго стояния и зерцало монашескаго подвига, правило уединенников и канона непорочнаго жительства, восхвалим в собрании богомудром, яко да молитвами его приимем от Христа Бога мир и душам нашим велию милость.
Слава, глас 3, егоже: Всеконечный, отче блаженный, Илиа вторый пустыню Мравалтавскую, яко Кармил или иный Хорив показал еси, славне, гонимый же немощною, яко жена, невидимою Иезавелию, более ты гнал еси ю велиим яже ко Господу дерзновением и уязвил еси мечем духовным яже от трапезы ея лукавыя помыслы, и вознеслся еси на колеснице огненней пламенем божественнаго желания, отонудуже, священная главо, престолу Бога и Агнца предстояще, поминай нас чада твоя, любовию почитающая память твою.
И ныне: праздника.
Стихиры на стиховне, глас 5: Преподобне отче:
Благодать чудес твоих превыше естества человеча и слова, яко бо человек в мир пришел еси и яко ангел изшел еси из мира, ум спасл еси и помышление земное от себе удалил еси, и исправил еси стопы своя к небеси с веселием, сего ради поеши и царствуеши присно со безплотными и радуешися в вышних во веки, сосуде чистоты Давиде отче желанный, поминай хвалящих празднство твое, и испроси у Христа даровати мир мирови и душам нашим велию милость.
Стих: Честна пред Господем смерть преподобных Его:
Мира сего воздвизаемую бурю шумом страстей, умирил еси чистотою, и яко доброе саждение украсился еси и расцвел еси, блаженне, и пустыню вселением утучнил еси и течением слез плодоносну сотворил еси ю, молчанием же израстил еси сладость благодати, и яко Иов праведный предстал Троице и почесть приял еси, блаженне, по трудом твоим и подвигом теплым, испроси у Христа даровати мир мирови и душам нашим велию милость.
Стих: Блажен муж бояйся Господа, в заповедех Его восхощет зело.
Блистает благодать твоея святыни трудов твоих сиянием светлым, икону бо твою зрим, богоносе, яко правило правды и утешение, отонудуже монахов собори обретоша тя прибежище и притекают к тебе, яко пристанищу тихому, отче, ихже покрый, Церковь же от страстей душевных же и плотских молитвою твоею сохрани, славне, и множество варвар лукавых разжени, и испроси у Христа даровати мир мирови и душам нашим велию милость.
Слава, глас тойже: Яко лествица, воздвижена от земли до небес, показался еси, блаженный Давиде, и от видимых и временных утех на высоту возвел еси верныя люди, преподобне, учением и подражанием деяний твоих, яже принесл еси Христу Господу, в воню благоухания и жертву приятную. Сего ради всесвятую память твою песненно совершаем, отче богоносный, и просим у Бога Человеколюбца твоими молитвами велия милости.
И ныне: праздника.
На благословение хлебов, тропарь преподобнаго, дважды, писан на малой вечерни, и праздника, единожды.
На утрени
На Бог Господь: тропарь праздника, дважды. Слава: преподобнаго. И ныне: праздника.
По 1-м стихословии седален, глас 1.
Подобен: Лик Ангельский:
Житие благочестно на земли исполнил еси, и жилище Святаго Духа показался еси, и просвещаеши верою к тебе притекающих, блаженне. Отонуду испроси у Владыки твоего просвещения душ наших, воспевающих ти, Давиде богомудре отче наш. Дважды.
Слава: праздника.
По 2-м стихословии седален, глас 5.
Подобен: Собезначальное (Слово):
Постника Господня песньми почтим, яко вся отсекша находящия страсти подвигом и предтвердым терпением, иже посрами сопротивоборца врага и всю его дерзость, и ныне молится Богу, еже помиловатися душам нашим. Дважды.
И ныне: праздника.
По величании седален, глас 8.
Подобен: Премудрости:
Иоанну подобяся Крестителю пустыню наследовал еси, отче, и нищетою жительствовал еси, ничесоже имея, блаженне, от плотския пищи, временныя и преходящия, еюже хранится сие существо плотское, но питаем был Духом Святым, отонудуже воздвигл еси души безчисленныя, подражающия ти, и собрал еси, во еже славити Бога и восхваляти доблести твоя, Давиде, гареджийцев славо, моли Христа Бога, грехов наших оставление даровати любовию совершающим память твою. Дважды.
И ныне: праздника, или богородичен:
Яко Всенепорочная Невеста Создателя, яко Неневесная Мати Спаса, яко Приятелище по естеству Утешителя, Всепетая, в беззакониих сущаго мя, обиталище мерзости и бесов посмеяние бывша, заступи и от лукавства их изми мя, и в селения света делы добрыми управи мя, Светоносная и Непорочная, и избави от облак страстей и причастия вышних достойна мя сотвори во свете невечернем мольбами Твоими.
Степенна, 1-й антифон 4-го гласа. Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми. Всякое дыхание. Евангелие от Луки, зачало 24.
По 50-м псалме стихира, глас 6:
Преподобный отче, во всю землю изыде вещание преспеяния твоего, сего ради в небесных обрел еси воздаяние трудов твоих, и полцы бесовския погубил еси, и лика ангельскаго достиг еси, имже равен соделался еси житием нескверным, дерзновение имаши ко Христу Богу, мира испроси душам нашим.
Канон праздника со ирмосом на 6 и преподобнаго, на 8, глас 4, творение Антониево, егоже краегранесие:
Сплетаю ти, Давиде, венец словесных цветов.
Песнь 1
Ирмос: Тристаты крепкия, рождейся от Девы, безстрастия во глубине, души тричастное потопи, молюся, да Тебе яко в тимпане, во умерщвлении телесе, победное воспою пение.
Соединившуся иногда сеченому в жажди, и погрузившему египтян телеса, воспеваша Моисей со Израилем, и ты победивый фараона безплотнаго, воспеваеши Господеви яко в тимпане песнь победную.
Един художеством высшим ведения и покоривый духи лукавыя, написание на небеси имени твоего, Давиде, приял еси радуяся и воспевая Господеви яко в тимпане песнь победную.
Гедеон аще и возжжением свещей очернивше водоносы и вострубивше в роги (см. Суд 7, 16-22), одоле многия тысящи те, но тысящнейшия ты одолел еси, водоносы, Давиде, не очернивше.
Видел еси зерцалом Невидимаго, отче, Егоже задняя от расселины камене виде Моисей (Исх 33, 22-23), ныне же яко лицем к лицу со Престолы зриши Его, скончав чаяние, блаженне.
Богородичен: От очес учеников приял облак Приятого Тобою, облаком легким, Дево, и вознесеся о Немже гласом трубным возглашают Силы, Господь с Тобою.
Катавасия праздника.
Песнь 3.
Ирмос: Не мудростию и силою и богатством хвалимся, но Тобою Отчею ипостасною мудростию, Христе: несть бо свят, паче Тебе Человеколюбче.
Славен еси во всех и чуден, богоносе, якоже Моисей и Самуил и Иаков и Даниил, раб верен и друг Божий возлюблен, отче.
Коварства сплетенныя лукавых человек иссек предивно концем жезла, из чрева принудив глаголати отроча во свидетельство святыни твоея, отче.
Ни единыя имея вещи долу влекущия, от еленей питался промыслом вышним, Бога бо, вместо вещей, имел, яко достояние свое.
Яко обетова нам, слугом Своим, славы Господь, наступати на змию и на скорпию, обетованием сим поправ змия, сожег еси и дракона, ядом умерщляюща.
Богородичен: Се день Господень, яко сташа нози Господни на горе Елеонсте, откуду взыде ко Отцу от Тебе плотию описанный, Богородице.
Кондак и икос праздника.
Седален преподобнаго, глас 8.
Подобен: Премудрости:
Богоноснаго Иоанна богоугодному житию духовне поревновав, взял еси Спасов Крест на рамена своя, и всякое попечение мирское отложил еси и во умерщвлении страстей спасался духом, и мир весь исполнил еси чудесы, благодатию Духа, отче святый Давиде, моли Христа Бога, яко да оставление грехов дарует любовию празднующим память твою. Дважды.
Слава, и ныне: праздника.
Песнь 4.
Ирмос: Неизследный Божий совет, еже от Девы воплощения Тебе Вышняго, пророк Аввакум усмотряя зовяше: слава силе Твоей, Господи.
Авраам вторый показался еси от Средоречия, божественным призванием, пришлец быв в земли чуждей, идеже в скинии благоговения учреди богообразныя помыслы.
Ублажаю, отче, лоно, идеже храними суть святыя твои, обращения умныя, еже к вожделенному всенепременному непременяемыя, второсветныя двизания.
Прославился еси, мудре, славою невещественнаго жития, и взошел еси от земли, ничесоже бо приобрел еси, токмо Христа в тебе неотходно, славу любящих Его неотъемлему.
Око за око, душу же за душу отдати умудрился еси, езеру бо во Есевоне (Песн 7, 5) уподобистеся непорочностию очеса твоя, ихже выну правая зрети вдал еси.
Богородичен: Удивишася ученицы, видевше возносящася от очес их, Иже седе на рамена Херувимския и вознеслся ко Отцу Сын Твой, Дево, обещавый с нами не разлучатися.
Песнь 5.
Ирмос: Возсияй ми, Господи, свет повелений Твоих, яко к Тебе дух мой утренюет, и поет тя: Ты бо еси Бог наш, и к Тебе прибегаю Царю мира.
Иакинф, образ печали, и иаспис, лице радости, еже есть от плодов духовных, показался еси ты добродетельми преиспещрен, блаженне Давиде правило монахов.
Осми челюсти седмию востягнул еси, и пять единому работати привел еси, и едино во двою зрящее Единому, посреде двоиц видиму, яко храм всесвятый предочистил еси, во образ светов вторых.
Виды страстей отгнал еси, яко лесть непостоятельную, и любомудренно выну поучался еси, еже на части рассечением, имже убил еси дракона сего, еже есть дух злаго разслабления, отче.
Яко иссоп, омывающ всего тебя, умудрил еси, Давиде, очеса твоя, сего ради ныне ублажи тя Слово Истинное, чудне, в смеющейся выну славе Его несказанной.
Богородичен: Знамения спасения нашего на боку и руцех и нозех божественных, из Тебе Воплощенное Слово, взяше в Своем еже на небо Вознесении, яко залог грешников кающихся, с Нимже Тя величаем, Дево Благословенная.
Песнь 6.
Ирмос: Возопи, прообразуя погребение тридневное, пророк Иона в ките моляся: от тли избави мя, Иисусе Царю сил.
Яко светильник убо неугасаем тела твоего, Давиде, возжегл еси душу твою любовию ко еже по естеству непременяемей Любве, Еюже просветился ты, яко молниею всевеликопламенною.
Виноград в невесту обрученней Христу души, мудре, твоей сохранил еси; на негоже призрев, Солнце славы просвети тя.
Радовался еси Господу, одеющему тя одеждею спасения и митрой2 обязующу, всехвальне, благолепнейшей, юже сотвори внутренняго человека пламенем.
Богородичен: Храм святый и престол Слова, Дево, явилася еси Ты, Егоже днесь со славою еже на небо восхождение свидетельствует лик божественный: премудрыя апостолы и Истины ученицы.
Кондак, глас 8:
Подобен: Мира Творец:
От Средоречия взошел еси, Звездо всесветлая, и пришел в пустыню Гареджи, и отонуду явлением твоим, яко рай, от насаждений святых прозябают насаждения словесныя, о нихже не престай молитися, Давиде блаженне.
Икос:
Немому сему земленому органу, даждь ми, слово премудрости, Христе Блаже, просвещаяй слепыя, Иже рыбари богословы соделавый и некнижныя умудривый, да приидет Дух Твой богатно на мя, яко глаголати доблести трудов и болезней, яже претерпе во имя Твое преподобный Давид, просветитель Гареджи, иже пришествием своим пустыню праздную и безплодную, многочадну яви, идеже собраннии возглашают: молитися о нас не престай, Давиде блаженне.
Песнь 7.
Ирмос: Спасый во огни Авраамския Твоя отроки, и Халдеи убив, яже правда праведно уловляше, препетый Господи Боже отец наших, благословен еси.
В ушеса убо разслабленных трубил еси ты трубою учений к пробуждению, совершенных же рогом к усовершению, всем же предносил еси высоким гласом: препетый Господи Боже отец наших, благословен еси.
Камню иногда несекомому, непререкаемый Моисее вторый, жезлом прикоснулся еси молитвы твоея, и отонуду напаяеши люди твоя, зовый: препетый Господи Боже отец наших, благословен еси.
Прослави Бог святую память твою, наипаче же раку честных мощей твоих, архиереи бо и цари досточестне почитают сия, воспевающе: отец наших Боже, благословен еси.
Очи твои праведныя ко Господу и уши твои, еже слышати словеса Его, очи же Господни на тя, и уши Его в молитву твою о поющих: препетый Господи Боже отец наших, благословен еси.
Богородичен: Вознеслся еси на небеса, Боже, рождейся нетленно от Неневестныя Матере и всем просветил еси нам славу Твою, верным Твоим и верою поющим: препетый Господи Боже отец наших, благословен еси.
Песнь 8.
Ирмос: Избавителю всех всесильне, посреде пламене благочествовавшия, снизшед оросил еси, и научил еси пети: вся дела благословите, пойте Господа.
Яко цвет польный и яко крин удольный, прозябый желанием к Нему, отче, посреде сел и удолий на лузех питался еси, и благословлял еси Его во всяком деле Его.
Двоенадесятицы число исполнил еси, Давиде, со ученики и соратники, темже приял еси и венец апостольский, постниче и великий столпе монашества.
Цветов паче шипковых доброта раздранных рубища твоего, хотящим взяти на себе легкое бремя Христово, имже студныя ижденутся страстей образы.
Богородичен: Иисуса, Егоже возносима во славе, Дево, видеша ученицы, егда приидет, якоже научихомся, на облаце, срести Его достойна мя сотвори.
Песнь 9.
Ирмос: Рождество Твое нетленно явися, Бог из боку Твоею пройде, яко Плотоносец явися на земли и с человеки поживе. Тя, Богородице, тем вси величаем.
Яко лев рыкая ходяй, иский поглотити души человечи, никогдаже возмогл приблизитися к тебе, Давиде, Ангели бо Господни ополчишася окрест тебе.
Терпения мраза зимняго и вара пустыннаго противу стояния, и стрел летящих во дни, превыше плоти душевной показал еси, Давиде, темже и возвеличися имя твое.
Алавастр мира божественнаго многоценна, источающ богатно воню благоухания и исцеления велия, содела, отче, нам раку мощей твоих Промыслитель Благий.
Идеже, отче, собор патриархов и пророк, и лик апостолов и мучеников, и стан исповедников и дев, по достоинству трудов твоих, и ты соучреждаем еси, дивне.
Богородичен: Се мужа, Емуже имя Восток, Тобою Дево, недр Отеческих неразлучное Слово, видехом возшедша ко Отеческой славе со славою.
Светилен.
Подобен: Свете неизменне:
Заповедь Спасову исполнил еси, Давиде, оставил еси всяку вещь мира сего, и с Ним распялся еси на Кресте, темже соделался еси монахов глава и начальник, мудре, и свеща разумения, предстатель нам буди пред Христом Богом, яко да спасет души наша. Дважды.
Слава, и ныне: праздника.
На хвалитех стихиры на 6, праздника 3, и преподобнаго 3, глас 4, Антониевы:
Давида, светяща сосуда Света Истинна, яко солнце сияюща не единем токмо отчинам нашим, но более мира краям до края словом стройно сплетенным восхвалим.
Бубакара испытуеши, дракона гониши огнем, испытанного возраждаеши второе, треблаженне, елени служити ти водиши, велий, камень твердый молитвою наводняеши, и плачущим образ и лице бываеши.
Фесвитянину подражал еси, отче пустынный, к Богу дерзновение приял еси, дивне, не отпал еси, егда воскипаше исполнение возрастных обращений, мудре, и достойно награду приял еси за сия вся.
Слава, глас тойже, Николаа Тбилскаго3:
Отшельников доброто, отче Давиде, от еленей питался еси, знамения дивныя совершал еси, Бубакара обратил еси, дракона огнем сожег еси, трудов множеству сшествовал еси на небеса, в Гареджи в пещере жительствует, душу возносит в руце Божии.
И ныне: праздника, глас тойже, Антониево:
Иже плоти дебельство не чудяся вресноту прияти изволивый Бог, на раменах херувимских носимый, Телом воздух сечет, яко Богочеловек, возносяйся со Отцем на престоле возсести.
Славословие великое и отпуст.
На литургии
Блаженна праздника рядовая (от канона песнь 8-я на 6) и преподобнаго, песнь 3 на 4. Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми. Апостол к Галатом, зачало 213. Аллилуиа, глас 6: Блажен муж бояйся Господа, в заповедех Его восхощет зело. Евангелие от Матфея, зачало 43. Причастен: В память вечную будет праведник.